Мексика һимны

Тарих

Футбол уенында. Мексика һимнын яше-карты җырлый

Латин Америкасында һимннарны бер-бер артлы һәм күпләп иҗат итү сөреше Испания һәм Португалия колонияләренең бәйсезлеккә ирешү чорына туры килә. Наполеонның җиңелүеннән соң Ауропада башланган үзгәрешләр “Яңа дөнья”га да барып ирешә. Әйтергә кирәк, азатлык идеяләрен тарату эшендә чыгышы белән Ауропадан булган кешеләр дә бик актив катнаша. Латин Америкасының шул елларда бәйсезлек алган күп кенә илләрендә беренче милли символларны нәкъ “Иске дөнья”ның эмиграциягә киткән иҗади зыялылары булдыра. Мексиканың беренче һимн проектларын да, 1821 елдан башлап, ил ватандашлары белән бергәләп, инглиз, испан һәм алман телле Ауропа кешеләре тәкъдим итә. Ләкин аларның ауропача иҗат җимешләре Мексика җирлегендә тернәкләнеп китә алмый.

1853 елның декабрендә Мексика президенты, генерал Антонио Лопес де Санта Анна (Antonio López de Santa Anna) илнең иҗтимагый эшләр министрлыгына иң яхшы патриотик шигырьгә бәйге игълан итәргә әмер бирә. Жюри карамагына тапшырылган 27 шигырьдән Франсиско Гонсалес Боканеграның (Francisco González Bocanegra, 1824-1861) 10 куплетлык әсәре җиңүче дип таныла.

Жюри карарын раслагач, Санта Анна композиторлар өчен дә бәйге игълан итә. Унҗиде кеше үзенең музыкаль иҗат җимешен тапшыра, һәм 500 долларлык бүләк испан композиторы Хайме Нуньоска (Jaime Nuñóz, 1824-1908) насыйп була. Ул бу вакытта Мексиканың милли оркестрында баш дирижёр булып хезмәт итә. Музыка авторы Ауропада, Каталониянең Жерона (Gerona) шәһәрендә туган.

Милли һимнның премьерасы 1854 елның 16 сентябрь көнендә Мехико шәһәренең Изге Анна театрында (Teatro de Santa Anna) үткәрелә (хәзер ул Милли театр дип атала).

Ләкин, шул чордан бирле даими кулланышта булса да, рәсми рәвештә һимн 1943 елда гына, президент Мануэль Авила Камачо указы белән кабул ителә. Мексиканың бөтен символик дәүләт атрибутлары (һимн белән бергә, байрагы, туграсы һәм башка милли символлары) 1984 елда гына тәгаенләнә: боларның барысын да президент Мигель де ла Мадрид Уртадо (Miguel de la Madrid Hurtado) җитәкчелегендәге махсус комиссия раслый.

1854 елда бәйгедә җиңеп чыккан Хайме Нуньос исә озакламый АКШның Баффало шәһәренә күчеп китә. 1901 елда аны яңадан Мексикага чакыралар, композитор гомуммилли танылуга лаек була, бу юлы аңа шактый зур акчалата премия, алтын һәм көмеш медальләр тапшыралар. Нуньос 1908 елда АКШта вафат була һәм шунда ук җирләнә дә. 1942 елның октябрендә аның җәсәден, Мехико шәһәренең Батырлар Галереясына күчереп, һимн сүзләренең авторы Боканегра кабере янында күмәләр. 

Other Languages
čeština: Mexická hymna
Bahasa Indonesia: Lagu kebangsaan Meksiko
lietuvių: Meksikos himnas
latviešu: Meksikas himna
polski: Hymn Meksyku
русский: Гимн Мексики
srpskohrvatski / српскохрватски: Himna Meksika
српски / srpski: Химна Мексика
українська: Гімн Мексики
Tiếng Việt: Himno Nacional Mexicano