Biggin can be a noun or a verb. Biggin is ane o the maist ancient human skills. It is pairt o the wey we hae survived an it is the maist weel-kent seembol o ilka civilisation. Awtho some ither craiturs big simple structures, e.g. birds, ants an bees, humans hae leart tae big in a great mony weys, for tae fit different needs an local condeetions. We big maistly for beildin. Biggins can beild fowk, or ainimals, or machinery, or onything. The simplest biggin is juist a ruif, for tae keep the space aneath dry, or shady. Eikin waws gies mair beildin frae the wind or rain.
By pittin a windae in a waw, wi or athoot gless, we lat licht inside the biggin. We leave a hole somewhaur big eneuch tae gang in an oot, wi a door that can be appent an closed. Aften the door will hae a lock, sae the biggin can be left siccar.
Gin a biggin is tae last for a lang time, it maun hae foonds. This is like the ruit o a tree, that is sunken in the grund an praps up the waws. Gin the grund is saft, the foonds maun be gey deep an strang.
Gin a biggin is heich eneuch, it can hae mair nor the ae fluir. Fowk can clim frae ae fluir tae the neist by a stair, or aiblins by a lift. This is kent as gaun up the stair, or doun the stair. Biggins can hae a fluir unner the grund an aw. This is for ordinar cried a laich room or dunnie.