Magna Grecie

'A Magna Grecie e 'a Sicilie: de grigge le zone colonizzate da le Achèe, de bblu da le Ione, de marrone chiare da le Dore e de marrone scure da le Grice nordoccidendale (Locrese)
Magna Grecie e otre colonie greche e fenice jndr'à l'Itaglie
(LA)
« Itala nam tellus Graecia maior erat. »
(TA)
« Quedde ca chiamane Itaglie ere Magna Grecie. »
(Ovidio, Fasti, IV)

'A Magna Grecie (jndr'à 'u latine: Magna Graecia, jndr'à 'u greche: Μεγάλη Ἑλλάς/Megálē Hellàs) ète l'arèe sciugrafeche d'a penisole tagliàne meridionale che avenìe andicamende colonizzate da le Grece partenne da l'VIII sechele n.C.

Le fatte storece d'a Magna Grecie, pure ca so collegate forte forte, onna essere tenute separate da chidde d'a Sicilia greche[1]. Pure ca l'espressione Megálē Hellàs ha state lette 'a prima vote relativamende tarde, jndr'à 'u II sechele n.C., jndr'à 'nu passe d'u storeche greche Polibio[2], se penze[3] comungue ca 'a genesi d'u congette de sotte ave assute jndr'à 'u VI sechele n.C., ca segne l'apogéè d'a storie d'a Magna Grecie, cu relazione a le faste politece, economece, culturale e artistece raggiunde jndr'à quidde periode[3].

Le origgene

Tembie de Hera a Metaponde
Colonne superstite d'u Tembie de Hera ( Cape Culonne) a Crotone

Apprisse 'a colonizzazzione d'u Mare Eggèe, 'mbrà 'u VIII e 'u VII sechele n.C., crestiane de civiltà greche (mercande, contadine, allevature, artiggiane) asserene fore jndr'à vanne meridionale de l'Itaglie (chidde ca osce a die sonde Basilicate, Calavrie, Cambanie e Pugghie) jndr'à l'ambite de 'nu flusse migratorie origgenate da singole cetate d'a Grecie andiche, le mutive avèrene state 'u 'nderesse pu sveluppe de le attività commerciale e le tenziune suggiale pe colpe d'u 'ngremende d'a popolazzione ca cu 'a produzione agricole ca stave non ge se riuscive a dà pàne. Ste crestiane, arrevate sus a le coste de l'Itaglie funnarene 'nu sbuènne de cetate cumme Kyme e Metapontion, pò Taras e Rhegion.[4]

Pe tradizione, 'a località addò s'avèrene stabbilìe avenève individuate seguenne l'indicazione ca dave l'Oracole d'u Sanduarie de Apolle a Delfi, ca avenève 'nderrogate da l' eciste, quidde ca avère state mise a cape de le colone. Pe le discendende de le crestiane grecie ca se chiandare jndr'à Penisole tagliàne, quiste ha state 'u periode jndr'à 'u quale avenìe raggiunde 'a massime ricchezze economeche, a quale se adda aggiungere pure 'u splendore jndr'à le cambe d'a culture e de l'arte, avenne seguite l'evoluzione d'a Civiltà Greche, jndr'à letterature, felosofije e arte, cu punde de sveluppe assaije vote superiore a chidde d'a madrepatrie.

Cumme conzeguenze de sta realtà de granne splendore, le zone colonizzate jndr'à penisole tagliàne, ne onne arrevate cu 'u nome de Magna Grecie (Megàle Hellàs): 'nu nome ca vuleve testimonià l'orgoglie pe avere date vite, lundane da 'a Grecie, a 'na comunitate de Grice ca avere raggiunde accussì ierte levèlle jndr'à 'u cambe suggiale, culturale e economeche, in combronde, cchiù granne d'a madrepatria stesse. Allore verse 'u III sechele n.C., se accumenzò a definì le colonie greche de l'Itaglie meridionale cumme facende parte d'a Magna Grecie (Megàle Hellàs). Referimende ca se penze avenìe 'nvendate da le colonie stesse, pe fà vedè 'a grannenezze lore in relazione a quedde d'a Grecie vecchie.

'U termine Magna Grecie se referisce allore a le popolazziune e civiltà, invece ca a 'n'endità territoriale e politeche.

Pure 'a Sicilie avìe 'nu sacche de colonie greche (cumme Zankle, Naxos, Selinus e Syraka), ca però seconde le grecie andiche non ge facevane parte de l'accussì dette Magna Grecie, a differenze de quidde ca invece penzavane le storece romane.

Le stirpe diverse

Crestiane origgenarie d'a cetate de Calcide d'a granne isole Eubea, funnò 'a prime Pithecusa (Ischia), pò Kyme ( Cuma) in Cambanie, quest'urtme 'nzieme a colone ca avenèvane da Cuma eolica, e 'mbrà 'u 756 n.C. e 'u 743 n.C. le doje cetate de Zancle (Messine) e Rhegion (Reggio), rispettivamende sus 'a sponde siciliane e quedde calavrese d'u Strette ca separe le doje terre.

Jndr'à l'anne successive, Grice de stirpe achèe avèrene date vite sus a 'u versande joniche apprime a Sybaris ( Sibari, 720 n.C.) e pò a Kroton (Crotone 710 n.C.), spengiute da 'a necessità de fuscere da carestie e sovrappopolazzione. Sembre sus a 'u Ionie, seconde fonde tramandate da 'u storeche Eusebio de Cesarea, 'nu picche de colone spartane funnarene 'a cetate de Taras (Tarde, 706 n.C.).

'Mbrà 'u 710 n.C. e 'u 690 n.C., 'nu gruppe de Locrese, guidate da Evante, ca avenèvane da le reggione d'a Grecie sus a 'u gurfe de Crisa, funnarene Lokroi Epizephyroi ( Locri Epizefiri), urtema cetate funnate jndr'à Calavrie da crestiane ca avenevane direttamende da 'a Grecie.

Le sub-colonie

File:Colonie greche in Adriatico.png
Colonie greche jndr'à l'Adriatiche (de russe chidde siracusane)

Jndr'à 'u tiembe, le cetate nuéve, pe mutive politece, de sovrappopolazzione, commerciale e de condrolle d'u territorie, allariarene 'a presenza lore jndr'à l'Itaglie, spannenne de fatte 'a civiltà greche a tutte 'u territorie ca osce a die, avéne chiamate Calavrie, jndr'à quidde tiembe canusciute cumme Enotrie o Itaglie, e a otre zone.

Le reggine funnarene Pyxus (Policastre Bussendine) jndr'à Cambanie; le locrese funnarene Medma (Rosarno) passanne da Cetate-forte (Polistena) e Hipponion (Vibo Valentia) jndr'à Calavrie; le sibbbarite facerene abbevescere le cendre indiggene de Laos e Skydros jndr'à Calavrie e funnarene Poseidonia ( Paestum), jndr'à Cambanie; le crotoniate funnarene Terina e Skylletion (a Roccellette de Borgia) e parteciparene a 'a fondazione de Kaulon (vecine a Monasterace marine) jndr'à Calavrie; le zanclei funnarene Metauros (Gioia Tauro) jndr'à Calavrie.

Condinue onne state invece le aggressiune de le tarandine fatte a le danne de le vecine Peucezi e Messape, arrevate cu 'a definitive sconfitte subbite a opere de le Iapigge jndr'à 'u 473 n.C., cundate da 'u storeche greche Erodoto 'mbrà le cchiù grave ricevute da popolazziune de stirpe greche.

Cu l'arrive de le leggione romane avvenute 'mbrà 'u 290 e 'u 280 n.C., se definisce 'u passagge sotte 'a protezzione e 'u dominie de Rome de tutte le cetate greche d'a penisole tagliàne.

Colonie greche jndr'à l' Adriatiche

'Nu programme forte forte de colonizzazzione avenìe accumenzate da Siracuse[5], a lepoche d'a tirannide de Dionisio 'u granne, atturne a 'u 387-385 n.C.

Stu fenomene 'nderessò tutte l'Adriatiche e, in particolare purtò a 'a funnazzione jndr'à l'Itaglie de Ankon (Angone) e de Adria (Adria); sus 'a coste dalmate vedìe 'a funnazzione de Issa (osce a die Lissa), Pharos (osce a die Cetatevecchie de Lesina), Dimos (osce a die Lesina)[6] e Korkyra Melaina (osce a die Curzola). Issa pò funnò da sole Tragyrion (osce a die Traù) e Epetion. Sus 'a coste albanese avenìe funnate Lissos (osce a die Alessio).

Cu stu programme de colonizzazzione Dionisio 'u Granne se assecurò 'nu condrolle totale sus a le rotte adriatiche ca purtavane 'u grane verse 'a madrepatrie, permettenne accussì a Siracuse de combetere cu le Etrusche jndr'à stu commerce. Pò resolvìe 'nu belle probbleme de politeche 'nderne, mannanne a popolà le colonie nuéve a tutte chidde ca non ge sopportavane 'u reggime sue tiranniche, addò lore avessere putute ristabbilìe le libbertà democrateche da jidde luate.

Apprime d'a colonizzazzione siracusane, ggià stavane presende jndr'à l'Adriatche oriendale de le colonie greche: jndr'à quidde ca osce a die jè 'u territorie albanese stavane Apollonia e Epidamnos-Dyrrachion (osce a die Durazzo); jndr'à quidde ca osce a die jè 'u territorie croate stave invece 'a colonie de Epidayron (osce a die Ragusavecchia).

Le colonie adriatiche siracusane non g'avenene annoverate jndr'à 'u sienze stritte cumme parte d'a Magna Grecie ma sò di jedde 'n'allariamende 'mbortande assaije.

Other Languages
Afrikaans: Magna Graecia
العربية: ماجنا غراسيا
asturianu: Magna Grecia
български: Магна Греция
brezhoneg: Magna Graecia
català: Magna Grècia
čeština: Velké Řecko
Чӑвашла: Аслă Греци
Deutsch: Magna Graecia
Ελληνικά: Μεγάλη Ελλάδα
English: Magna Graecia
Esperanto: Granda Grekio
español: Magna Grecia
euskara: Magna Graecia
français: Grande-Grèce
galego: Magna Grecia
hrvatski: Magna Graecia
Bahasa Indonesia: Yunani Besar
íslenska: Magna Graecia
italiano: Magna Grecia
македонски: Голема Грција
Napulitano: Magna Grecia
Nederlands: Magna Graecia
português: Magna Grécia
română: Magna Graecia
sicilianu: Magna Grecia
srpskohrvatski / српскохрватски: Magna Graecia
Simple English: Magna Graecia
slovenščina: Magna Graecia
српски / srpski: Велика Грчка
svenska: Magna Graecia
Türkçe: Magna Graecia
українська: Велика Греція
Tiếng Việt: Magna Graecia
中文: 大希腊