Agiut:Parlà locaj

La lenga piemontèisa a l'ha mila sfumadure locaj e contut che la pipart ëd la gent a la scriva an piemontèis comun, a-i son vàire person-e che a l'han pì car dë scrive a la meuda 'd sò pais. Ant un sistema anformativ coma cost-sì, andova un a scriv e vàire dj'àutr a passo a corege e antegré, sòn a peul esse na sorgiss ëd complicassion. I soma donca dapress a sperimenté un sistema che an daga la possibilità ëd caturé e fissé la varietà dël piemontèis, nopà che raboté via le diferense.

Ës sistema-sì i l'oma anventasslo nojàutri, i 'l l'oma mach noi, e quindi a-i é pa gnun-a esperiensa ch'i peulo dovré për regolesse. I l'oma tant da manca ëd l'opinion ëd la gent e ëd chi ch'a lo dòvra, për lòn ch'a toca soa praticità. A-i é gnun but polìtich ò ideològich, as trata mach dë fé n'utiss ch'a fasa belfé a travajé.

L'anvit a l'é a taché miraco dai tema locaj. A sarìa bel se minca comun piemontòfon a l'avèissa sò artìcol scrit ëdcò pròpe coma a parlo ant sël pòst. E midem a val për costume, travaj e coltivassion con na rèis teritorial precisa. Peui gnun a-j ampediss a gnun dë parte a scrive dj'artìcoj ëd chìmica an valsusin, për carità...

Other Languages