Marcus Antonius

Marcus Antonius, Bostbild ut de Vatikaanschen Museums

Marcus Antonius (* 14. Januar 83 v. Chr. oder 86 v. Chr.; † 1. August 30 v. Chr.) weer unner Gaius Iulius Caesar bit to den sien Dood 44 v. Chr. de Magister equitum. 44 v. Chr. weer he, tohopen mit Caesar, to'n röömschen Kunsel wählt wurrn. Vun 43 v. Chr. af an is he, tohopen mit Marcus Aemilius Lepidus un Gaius Iulius Caesar Octavianus (later Augustus) Deel vun dat Tweete Triumvirat ween. Düt Triumvirat („Dreemannschop“) weer Baas över de Stadt Rom un dat Röömsche Riek.

Leven

Antonius weer de Söhn vun den Praetor Marcus Antonius Creticus un den siene Fro Julia Antonia. Vun de Mudder ehre Siet her weer he en wietlöftigen Neffen vun Caesar.

In de Dreemannschop weer Antonius an'n Anfang de Starkste. Lepidus hett jummers bloß en ringe Rull speelt, man amenne is Octavian in den Striet um de Macht twuschen de Triumvirn de Winner ween. Dat hett ok dor an legen, datt sik Marcus Antonius eernsthaftig wat rutnahmen harr in de Politik, as he nich bloß wat anfangen dö mit de Königin vun Ägypten, Kleopatra, man as he ehr ok noch röömsche Provinzen schunken hett un ehr den Titel „Königin vun de Könige“ verlehnt hett, dorto ok siene Kinner mit ehr to'n König maakt hett. Caesar sien Söhn Caesarion hett he ok „König vun de Könige“ nömmt.

As Octavian Antonius sien Scheedebreef an Octavia (Octavian siene Suster) rutgahn laten hett, tohopen mit Antonius sien Testament, dat bi de Vesta ehre Jumfern in Rom dalleggt wurrn weer, hett de Senat vun Rom Marcus Antonius to en „Fiend vun den Staat“ verklaart.

Marcus Antonius hett en grote Expeditschoon gegen dat Partherriek tostanne bröcht, man 36 v. Chr. is he dor bannig slahn wurrn. He is unner den Bann vun Kleopatra kamen, de vörmols Caesar siene Fro ween weer. Later hett he ehr freet un de beiden hefft dree Kinner mit'nanner harrt, eenmol de Tweeschen Kleopatra Selena II. un Alexander Helios, un denn noch, veer Johre later den Söhn Ptolomaios Philadelphos. Dor hett he in Rom dat Schreckbild vun en Ägyptisch-orientaalsche Despotenherrschop mit waak ropen, wo amenne Kleopatra un ehre Familie över Rom regeern döen. Octavianus hett düsse Angst in Rom utnützt un hett dat Paar 31 v. Chr. in de Seeslacht bi Actium slahn.In dat neegste Johr is Octavian denn in Alexandria inmarscheert. Antonius hett dor Kleopatra de Schuld an geven un se hett sik denn, ut Bangigkeit, wiel he so vergrellt weer, in den Graffbo insluten laten, den se al för sik boen laten harr. Antonius hett se utrichten laten, se weer ja nu doot. Antonius hett dat glöövt un hett sik up sien Sweert fallen laten.

Other Languages
Afrikaans: Marcus Antonius
Alemannisch: Marcus Antonius
azərbaycanca: Mark Antoni
беларуская: Марк Антоній
български: Марк Антоний
brezhoneg: Marcus Antonius
bosanski: Marko Antonije
català: Marc Antoni
čeština: Marcus Antonius
English: Mark Antony
Esperanto: Marko Antonio
español: Marco Antonio
euskara: Marko Antonio
français: Marc Antoine
hrvatski: Marko Antonije
Bahasa Indonesia: Markus Antonius
íslenska: Marcus Antonius
italiano: Marco Antonio
Basa Jawa: Mark Antony
қазақша: Марк Антоний
Кыргызча: Антоний Марк
lietuvių: Markas Antonijus
latviešu: Marks Antonijs
монгол: Марк Антони
Bahasa Melayu: Marcus Antonius
Nederlands: Marcus Antonius
português: Marco Antônio
română: Marc Antoniu
русский: Марк Антоний
srpskohrvatski / српскохрватски: Marko Antonije
Simple English: Mark Antony
slovenčina: Marcus Antonius
slovenščina: Mark Antonij
српски / srpski: Марко Антоније
Seeltersk: Marcus Antonius
Türkçe: Marcus Antonius
татарча/tatarça: Марк Антоний
українська: Марк Антоній
oʻzbekcha/ўзбекча: Antoniy Mark
Tiếng Việt: Marcus Antonius
Yorùbá: Mark Antony