Davide Rebellin

Davide Rebellin bi de Route du Sud 2011

Davide Rebellin (* 9. August 1971 in San Bonifacio, Italien) is en italieensch Radrennfohrer.

Karriere

Rebellin fung sien Profi-Karriere 1995 bi dat Radsportteam MG-Technogym an

Sien Dörbröök harr he all een Johr later bi den Giro d’Italia, as he den sössten Platz in de Gesamtwertung recken dee, nahdem he de söbente Deelstreck wunn un dordör dat Maglia Rosa vun den Gesamtführenden erobern kunn, dat he bit to de twalfte Deelstreck behollen dee.

In de folgen Johren hett he sück denn to en Spezialisten för körter Rundfohrten un Eendagsrennen entwickelt. So wunn he to'n Bispeel 2001 dat Deelstreckenrennen Tirreno–Adriatico un 2004 as eerst Fohrer överhoopt nahnanner de dree Fröhjohrsklassiker Amstel Gold Race, La Flèche Wallonne as ok Lüttich-Bastogne-Lüttich.

Nahdem Rebellin över mehrere Johren trotzdem nich för de italieensch Natschonalmannschap beropen wurr, nehm Rebellin in' September 2004 de argentiensch Staatsbörgerschap an, um in dat Trikot vun Argentinien bi de UCI-Straaten-Weltmeesterschapen antotreeden. Sien Deelnahm för Argentinien wurr aber wenig Daag vör dat Rennen dör de UCI wegen en Förmfehler aflehnt. [1]

Later is he weer för den italieenschen Verband fohren un keem bi dat Straatenrennen bi de Olympisch Sommerspielen 2008 up den tweeten Platz. Allerdings hemm Nahkontrollen Enn' April 2009 de Innahm vun CERA in' Vörfeld vun dat Rennen ergeeven. In' November 2009 wurr hüm dordör de wunnen Sülvermedaille weer aferkannt. [2] De Entscheeden vun den IOC wurr van' Court of Arbitration for Sport in dat Johr 2010 bestätigt un Rebellin dorup vun dat för hüm tostännig monegassischen Verband för twee Johren sparrt. [3]

Other Languages
español: Davide Rebellin
français: Davide Rebellin
italiano: Davide Rebellin
Lëtzebuergesch: Davide Rebellin
Limburgs: Davide Rebellin
Nederlands: Davide Rebellin
português: Davide Rebellin