စိန့်ဖရန်စစ်(စ်)

စိန့်ဖရန်စစ်(စ်)ပုံ ပန်ချီကား။

စိန်ဖရန်းစစ် (ခရစ် ၁၁၈၂-၁၂၂၆)

စိန်ဖရန်စစ်သည် ဖရန်စစ္စကန်ခေါ် ခရစ်ယန်ဘုန်းကြီး ဂိုဏ်းကို တည်ထောင်ခဲ့သူဖြစ်သည်။ အမည်ရင်းမှာ ဂျိုဗန္နီးဗေ နားဒိုးနေဖြစ်၏။ အီတလီပြည် အဆီဇီမြို့သားဖြစ်၍ အဆီဇီမြို့မှ ဖရန်းစစ်ဟူ၍ လည်းတွင်၏။ မိဘများမှာ ချမ်းသာကြွယ်ဝသူ များဖြစ်သည်။ ငယ်စဉ်က လူချမ်းသာသားပီပီ လှပစွာဝတ်စား ဆင်ယင်၍၊ ပျော်မှုရွင်မှုများဖြင့်သာ အချိန်ကုန်ခဲ့သော်လည်း၊ အသက် ၂ဝ အရွယ်ခန့်တွင် အသည်းအသန် နာမကျန်းပြီး နောက် တစ်ဖြည်းဖြည်း သတိသံဝေဂရလာသည်။ ထို့နောက် တွင်ကား ဖရန်းစစ်သည် လောကီစည်းစိမ်ကို စွန့်လွှတ်ပြီးလျှင် သူ၏ တစ်သက်ကာလပတ်လုံး ခရစ်တော်၏တရားကို ကျင့်သုံး ကာ ဆင်းရဲသားများ၏ အကျိုးစီးပွားသက်သက်ကိုသာ ဆောင် ရွက်ရန် ဆုံးဖြတ်လိုက်လေသည်။

မိမိ၏ ဥစ္စာပစ္စည်းများကိုရောင်း၍ ဆင်းရဲသားနှင့် ဒုက္ခိတ များအား ရက်ရောစွာပေးကမ်းစွန့်ကြဲသဖြင့်၊ ဖခင်ဖြစ်သူက အမျက်ထွက်ပြီးလျှင် ဖရန်းစစ်အား အမွေဖြတ်လိုက်လေသည်။ သို့ရာတွင် ဖရန်းစစ်သည် မည်သို့မျှ စိုးရိမ်ကြောင့်ကြခြင်း မရှိဘဲ၊ အဝတ်တစ်ထည် ကိုယ်တစ်ခုနှင့် ထွက်လာခဲ့၍ တော ထဲ၌ ဆင်းရဲငြိုငြင်စွာ နေထိုင်လျက်၊ ခရစ်တော်၏တရားများကို ကျင့်သုံးနေလေသည်။ အကြာမီ သူ့ကိုကြည်ညိုသူ နောက်လိုက် တပည့်များ ပေါ်ပေါက်လာသည်။ ဖရန်းစစ်နှင့် တပည့်များ သည် ဖိနပ်မပါ၊ ငွေမကိုင်ဆောင်ဘဲ၊ အီတလီပြည်အလယ်ပိုင်း တွင်လှည့်လည်၍ သာသနာပြုတရားဟောကြ၏။ ဖရန်းစစ် တွင် တပည့် ၁၂ ယောက်ရသောအခါ ပုပ်ရဟန်းမင်းကြီး၏ သဘောတူညီချက်ဖြင့် ဖရန်စစ္စကန်ဂိုဏ်းကို တည်ထောင် လိုက် လေသည်။

ဖရန်စစ္စကန်ဘုန်းကြီးများသည် ကိုယ်ကျင့်သီလစင်ကြယ် ရမည်။ ပစ္စည်းဥစ္စာမစုဆောင်းရ၊ ခြိုးခြံစွာ စားသောက်နေထိုင် ကြရသည်။ ဆင်းရဲသားများကို ကူညီစောင့်ရှောက်ရသည်။ ဤ ကဲ့သို့ မွန်မြတ်သော တရားကို ကျင့်သုံးသဖြင့် နောင်တွင် ဖရန်းစစ်၏ တရားကို ယုံကြည်နှစ်သက်သော မိန်းမများပင် တပည့်ခံရန်ရောက်လာကြ၏။ ထို့ကြောင့် ၁၂၁၂ ခုနှစ်တွင်၊ ဖရန်စစ္စကန်သီလရှင် ဂိုဏ်းဟူ၍ ပေါ်လာသည်။ ထို့နောက် ဖရန်စစ္စကန် လူဝတ်ကြောင်ဂိုဏ်းများလည်း ပေါ်ထွက်လာခဲ့ လေသည်။


ဖရန်းစစ်ကား မိမိ၏ ဝါဒကို လိုက်လံဟောပြောရာ၌ စပိန်ပြည် အစ္စလမ်အယူဝါဒီ မူးဝါးလူမျိုးတို့ နေထိုင်သော နေရာများသို့ပင်အသက်စွန့်ပြီး သွားရောက်ခဲ့လေသည်။ လူများ စွာက ချစ်ခင်ကြည်ညို၍ သူ၏သီလတန်ခိုး မေတ္တာတန်ခိုး ကြောင့် အံ့ဖွယ်သရဲများကိုပင် ပြုလုပ်နိုင်သည်ဟု ယုံကြည်လာ ကြ၏။

လူတို့အပေါ်တွင် လူတန်းစားမရွေး၊ လူမျိုးမရွေး၊ မေတ္တာ တရားတစ်မျိုးတည်းထားကာ၊ ကျင့်သုံးနေထိုင်ခဲ့၏။ သူ၏ မေတ္တာတရားကြောင့် ကျေးငှက်များသည် ဖရန်းစစ်အားကြောက် ရွံ့ခြင်းမရှိဘဲ၊ အနားသို့ချည်းကပ်လျက် တရားနာယူကြသည်ဟူ ၍ပင် ဆိုစမှတ်ပြုကြသည်။

ဖရန်းစစ်သည် ကွယ်လွန်သောအခါ၊ ခရစ်တော် ယေရှု လက်ဝါးကပ်တိုင်၌ တင်၍ အသတ်ခံရစဉ်က၊ ရရှိသောဒဏ်ရာ ငါးချက်အတိုင်း၊ သူ၏ ကိုယ်ပေါ်တွင်ပေါ်လာသည်ဟုဆိုသည်။ ဖရန်းစစ်ကို ခရစ်တော်ကဲ့သို့ မွန်မြတ်သော အကျင့်ရှိ၍၊ နူးညံ့ သိမ်မွေ့သူ ပုဂ္ဂိုလ်ထူးဟု ယုံမှတ်လျက်ရှိကြသည်။ ၁၂၂၆ ခုနှစ် အသက် ၄၄ နှစ်အရွယ်တွင် အနိစ္စရောက်ပြီးနောက် နှစ်နှစ်ခန့် အကြာတွင် ဖရန်းစစ်အားသူတော်စင်တစ်ပါးအဖြစ် အသိအမှတ် ပြုကြလေသည်။[၁]

Other Languages
Alemannisch: Franz von Assisi
azərbaycanca: Assizli Fransisk
Boarisch: Franz vo Assisi
беларуская: Францыск Асізскі
беларуская (тарашкевіца)‎: Францішак з Асізі
brezhoneg: Frañsez a Asiz
bosanski: Franjo Asiški
Avañe'ẽ: Francisco de Asís
Bahasa Indonesia: Fransiskus dari Assisi
norsk nynorsk: Frans av Assisi
Kapampangan: Francisco de Asis
português: Francisco de Assis
srpskohrvatski / српскохрватски: Franjo Asiški
Simple English: Francis of Assisi
slovenčina: František z Assisi
slovenščina: Frančišek Asiški
српски / srpski: Фрањо Асишки
Tiếng Việt: Phanxicô thành Assisi