Ойн суусар

Гадаад төрх

Энэ амьтан нь гэрийн муурны чинээ биетэй. Биеийн урт 53 см, өтгөн саглагар сүүл нь 25 см, эрэгчин нь үл ялиг биеэр том байна. Биеийн жин дундажаар 1.5 кг юм. Арьс үс нь цайвараас хар бор зүстэй байх ба өвлийн улиралд урт сортой торгомсог байна. Хоолойн хэсгийн үс нь шаргал, шар өнгөтэй.

Ойн суусар мод ихтэй газар нутаглана. Модны хонгил нүхэнд үүрээ засдаг. Модонд авирахдаа чадамгай ба шөнийн цагаар болон үүрээр илүү идэвхтэй юм. Гол идэш тэжээл нь жижиг хөхтөн, шувуу, шавьж хорхой, мэлхий, үхсэн амьтны сэг зэрэг юм. Мөн жимс, өндөг, самар, зөгийн балаар хооллох явдал бий.

Энэхүү суусар тэжээмэл байдалд 18 хүртэл насалсан байна. Зэрлэг тохиолдолд голдуу 9-10 жил амьдардаг. 2-3 настайдаа үржилд орох нас гүйцдэг. Дөнгөж төрсөн зулзага 30 гр жинтэй байх аж.