Buffalo Bill

De Buffalo Bill
Annonce am Wort fir d'Show an der Stad, den 3.9.1906.

De Buffalo Bill, mam richtegen Numm William Frederick Cody, gebuer de 26. Februar 1846 bei LeClair, Scott County, Iowa a gestuerwen den 10. Januar 1917 zu Denver am Colorado) war e berühmte Bisonjeeër a Showman.

Schonn als Kand huet de William Frederick Cody fir d'Firma Russel & Majors (méi spéit Russel, Majors & Waddell) als Zuch-Machinist, Wagon Master, Pony-Express-Reider a Kutscher geschafft. Als jonke Mann war hie beim Goldrausch a Colorado mat dobäi an huet duerno beim Pony-Express geschafft. Méi spéit gouf hien Eclaireur (Scout) fir d' Nordstaaten-Unioun, souwuel am Amerikanesche Biergerkrich wéi och bei de Kricher géint d' Indianerstämm vun de Kiowa a Comanche am Kansas. Tëscht 1867 an 1868 huet hien d'Fleesch fir d'Aarbechter vun der Kansas Pacific Railway geliwwert. Well e Succès als Bisonjeeër hat, krut e säi Spëtznumm „Buffalo Bill“. [1] Vun 1868 bis 1872 war hien nees Scout, dës Kéier fir d'US-Arméi.

Den Ned Buntline, en US-amerikanesche Journalist vun New York, huet de Cody duerch Theaterstécker, Reportagen an Erzielungen als „Buffalo-Bill“ bekannt gemaach. Vill Situatioune goufen an den Erzielungen iwwerdriwwen an hu mat zu de Klischeeën iwwer de Wëlle Westen bäigedroen, déi zum Deel bis haut iwwerlieft hunn.

De Cody huet 1883 seng eege Buffalo Bill's Wild West Show gegrënnt, e grousse Spektakel, bei deenen honnerte vu Statisten an Déieren zum Asaz koumen, an an där "Wild-West-Zeenen" gespillt goufen. Berühmt indianesch Häuptlingen, wéi de Sitting Bull, hunn zäitweileg bei deene Showe matgemaach.

De Cody ass mat senger Show och an Europa op Tournée gaangen, véiermol tëscht 1887 an 1892, an dann nach eng Kéier véiermol tëscht 1902 an 1906. [2]

Mat der Wild West Show zu Lëtzebuerg

Den 3. September 1906 ass de Spektakel och, géint der Enn vun der Tournée an Däitschland, an ier et geschwënn duerno an d'Belsch viru goung, an der Stad Lëtzebuerg opgefouert ginn. Um Programm stoung ë. a. The Congress of Rough Riders of the World, Pioniere der Steppen an eng "Nostellung" vun der Schluecht um Little Big Horn. 100 Indianer ("echte Rothäute, Häuptlinge, Krieger, Weiber und Kinder"), Samurai, Kosaken aus dem Kaukasus, Amerikanesch Zuaven, d'Zivil-Miliz vun de Vereenegte Staaten, Beduinen aus der Sahara, Lasso-Werfer, Cow-boys, mexikanesch Vaqueros, Krichsvetreranen "aus allen Arméie vun der Welt" wieren enger Annonce vum 22. August 1906 no dobäigewiescht - am Ganzen eng 800 Mënschen a 500 Päerd. D'Luxemburger Wort beschreift a senger Nummer vum 3.- 4. September, datt moies tëscht 8 an 9 Auer 3 Zich mat am Ganzen enger 50 Waggonen op der Gare ukomm wieren, an dat ganzt Material an d'Leit virun den Ae vun de Virwëtzegen, op d'Märeler Strooss bruecht gi wieren, wou d'Zelter opgeriicht goufen. Et gouf eng Mëttes- an eng Owesvirstellung, viru jee 3.500 Sëtzplazen, an d'Annonce huet ausdrécklech drop higewisen, datt d'Zelt elektresch beliicht wier, sou datt een och owes näischt verpasse géif. [3]

Spéiderhi gouf de Spektakel als "enttäuschend" beschriwwen, den Arme Teufel schrouf, et wier eng "eitel amerikanische Flunkerei" gewiescht: vill ze kuerz an ze deier fir dat wat gebuede gouf. En huet och d'Wort an d' Luxemburger Zeitung dofir kritiséiert, am Virfeld massiv direkt oder indirekt Reklamm gemaach (an domat gutt verdingt) ze hunn. [4]

Other Languages
Afrikaans: Buffalo Bill
العربية: بوفالو بيل
aragonés: Buffalo Bill
asturianu: Buffalo Bill
български: Бъфало Бил
bosanski: Buffalo Bill
català: Buffalo Bill
čeština: Buffalo Bill
Cymraeg: Buffalo Bill
Deutsch: Buffalo Bill
English: Buffalo Bill
español: Buffalo Bill
Esperanto: Buffalo Bill
euskara: Buffalo Bill
français: Buffalo Bill
galego: Buffalo Bill
한국어: 버펄로 빌
hrvatski: Buffalo Bill
italiano: Buffalo Bill
עברית: באפלו ביל
ქართული: ბუფალო ბილი
latviešu: Bizonu Bils
magyar: Buffalo Bill
Nederlands: Buffalo Bill
polski: Buffalo Bill
português: Buffalo Bill
русский: Буффало Билл
Simple English: Buffalo Bill
slovenčina: Buffalo Bill
slovenščina: Buffalo Bill
српски / srpski: Буфало Бил
svenska: Buffalo Bill
Türkçe: Buffalo Bill
中文: 水牛比爾