Կամավորների միջազգային օր

Կամավորների միջազգային օր (դեկտեմբերի 5), լրիվ անունը՝ Կամավորների միջազգային օր՝ հանուն տնտեսական և սոցիալական զարգացման (ՄԱԿ-ի այլ լեզուներով. անգլ.՝ International Volunteer Day (IVD) for Economic and Social Development, ռուս.՝ Международный день добровольцев во имя экономического и социального развития), հաստատվել է ՄԱԿ-ի կողմից և 1985 թ.-ից հանդիսանում է միջազգայնորեն հիշատակելի օր։ Կամավորական կազմակերպություններին և կամավորներին հնարավորություններ է առաջարկում, որպեսզի նրանք տեսանելի դարձնեն տեղական, ազգային, միջազգային մակարդակներում կատարած իրենց ներդրումը։

Նախապատմությունը

Օրը հաստատվել է 1985 թվականի դեկտեմբերի 17-ին, ՄԱԿ-ի Գլխավոր ասամբլեայի 40-րդ նստաշրջանի ժամանակ[1][2]: Այս որոշմամբ ՄԱԿ-ը ցանկանում է նպաստել Հազարամյակի զարգացման նպատակներին (MDGs) հասնելու համար կամավորների ներդրած ջանքերի ու նրանց գործունեության ճանաչելիությանը։

ՄԱԿ-ի բանաձևերը

1985 թ. դեկտեմբերի 17-ի 40/212 բանաձևով Գլխավոր ասամբլեան (ԳԱ) կառավարություններին առաջարկում է ամեն տարի դեկտեմբերի 5-ը նշել որպես Կամավորների միջազգային օր՝ հանուն տնտեսական և սոցիալական զարգացման, ինչպես նաև կոչ է անում միջոցներ ձեռք առնել՝ բարձրացնելու տեղեկացվածությունը կամավորների ծառայության, նրանց ներդրումների կարևորության մասին, այդպիսով շահագրգռելով ավելի շատ մարդկանց կյանքի բոլոր ոլորտներում իրենց կամավորական ծառայությունը առաջարկելու համար՝ ինչպես սեփական համայնքում, այնպես էլ արտերկրում։

1997 թ. նոյեմբերի 20-ի 52/17 բանաձևով ԳԱ-ն 2001 թ. հռչակում է Կամավորների միջազգային տարի՝ նպատակ ունենալով նպաստել կամավորների ճանաչելիությանը, նրանց գործունեության հեշտացմանը, ցանցերի ստեղծմանը և կամավորական ծառայության առավելության ընդունմանը։

2001 թ. դեկտեմբերի 5-ի 56/38 բանաձևով ԳԱ-ն ընդունում է մի շարք խորհրդատվական առաջարկներ (ռեկոմենդացիաներ)՝ ուղիների վերաբերյալ, որոնց օգնությամբ կառավարություններն ու ՄԱԿ-ի համակարգը կկարողանային աջակցել կամավորությանը, և խնդրում է լայնորեն տարածել այդ առաջարկները։

2008 թ. դեկտեմբերի 18-ի 63/153 բանաձևով ԳԱ-ն սահմանում է, որ մոտավորապես 2011 թ. դեկտեմբերի 5-ին, Ասամբլեայի 66-րդ նստաշրջանի երկու լիագումար նիստ պետք է նվիրվեն Միջազգային տարվա արդյունքներին, հետագա գործունեությանն ու նրա տասներորդ հոբելյանը նշելուն։

Other Languages