Howard Phillips Lovecraft

Howard Phillips Lovecraft
Howard Phillips Lovecraft in 1915 (2).jpg
H. P. Lovecraft 'sy vlein 1915
Ruggit20 Luanistyn 1890(1890-08-20)
Providence, Ellan Rhode, SUA
Hooar baase15 Mart 1937 (eash 46)
Providence, Ellan Rhode, SUA
Ennym screeueeLewis Theobold, Humphry Littlewit, Ward Phillips, Edward Softly
KeirdNoaskeealagh, bard
AshoonaghtSUA
Amm screeuee1917-1936
GenreynFar-skeealaght scoaghagh, far-skeealaght heanse, fansee, far-skeealaght whaagh, far-skeealaght Ghothagh
Gleashaght screeueeCosmaght
Obbyryn feeu baghtThe Call of Cthulhu, The Shadow Out of Time, At the Mountains of Madness, The Case of Charles Dexter Ward
Sheshey poost ny ben phoostSonia Greene (1924–1929)
Ennym screeuitLovecraft signature.svg

By screeudeyr Americaanagh eh Howard Phillips Lovecraft (20 Luanistyn, 1890 – 15 Mee Vayrnt, 1937). Screeu eh skeealyn scoaghagh, fansee, as far-skeealaght sheanse son y chooid smoo, as y fo-ghenre far-skeealaght whaagh er lheh.

Bea

Rug Lovecraft er 20 Luanistyn, 1890 ec 454 Angell Street ayns Providence, Ellan Rhode.[5] By Winfield Scott Lovecraft as Sarah Susan Phillips Lovecraft yn ayr as y voir echey.[5]

Va Howard troggit ec e voir, e nauntyn, as ayr e voir. V'eh mogh-appee: dod eh lhaih rish tree bleeantyn d'eash as screeu eh skeealyn rish shey. Lhaih eh Shee-Skeealyn ny braaraghyn Grimm as Oie as Thousane rish queig, as hug er hene y far-ennym Abdul Alhazred yinnys eh ymmyd jeh myr screeudeyr y Necronomicon 'sy skeealyn echey.[5] Dinsh y shennayr echey skeealyn da rere'n aght Gothagh, as mooadaghey yn anaase v'echey hannah er reddyn quaagh. Ayns 1898, hooar eh obbraghyn Edgar Allan Poe as shen bun cummaght mooar echey: "...rish hoght bleeantyn d'eash honnick mee speyr ghorrym Argos as yn Çhissyl jeant dorraghey lesh ennal miasmagh yn oaye!"[1]

V'eh çhing dy mennick, as bun shicklaagagh ec kuse jeh.[5] Liorish teaym nearag, daag eh yn ard-scoill Hope Street ayns 1908 gyn teishtys erbee as coayl studeyraght ec Ollooscoill Vrown.[6] Ren eh fadaneagh jeh hene, as ynsaghey ram ass lioaryn gyn monney eab dy ve yn-failley. V'eh cliaghtey lhaih earishlioaryn pulpey, as v'eh brasnit ec skeealyn neuvlastal Fred Jackson 'syn earishlioar Argosy. Hug eh screeuyn er y chooish da'n earishlioar, as va co-screeu ayn rish lane vlein, goaill stiagh bardaght chraidoilagh.[5] Ghow fer ennmyssid Edward Daas tastey jeh, as eshyn ny Reagheyder Oikoil y United Amateur Press Association, possan dy screeudeyryn ancheirdagh Americaanagh screeu skeealyn as hug magh earishlioaryn. Chuirr eh Lovecraft dy gholl stiagh 'sy phossan, as ren eh shen. Screeu eh ymmodee daanyn as traaghtyn,, as haink eh dy ve Eaghtyrane (1917-18) as eisht Reagheyder Oikoil (1920-22, 1924-25) y phossan.[5] Ayns 1917, lesh greinnaghey y phossan, ghow Lovecraft toshiaght dy screeu far-skeealyn reesht: The Tomb as Dagon.[5] Screeu eh dy kinjagh ny yei shen, agh cha dooar eh obbyr vondeishagh as va eiraght y lught-thie lheie ersooyl. Fy yerrey, ghow eh toshiaght obbraghey myr cooyl-screeudeyr[noa] (ghost-writer) er faill veg.[5]

Haink teaym nearag er e voir ayns 1919 as hie ee stiagh ayns thie lheeys.[5] Hooar ee baase er 24 Mee ny Boaldyn 1921 erreish da laue-lheeys brockit eddryman buighid.[5] Va Lovecraft seaghnit lesh shen, agh ayns Jerrey Souree hie eh dys cohaggloo ayns Boston as haink eh da quiayl ben veagh dy phoosey, Sonia Haft Greene.[5] Phoos ad er 3 Mee Vayrnt 1924 as cummal ayns arasane Honia ayns Brooklyn. Va skeealyn Lovecraft ry-akin ayns Weird Tales as va Sonia gobbraghey ayns shapp edd.

Hug Sonia shapp edd e hene er bun, agh cha row eh rahoil.[5] Haink çhingys urree as v'eh urree cummal ayns thie lheihys rish tammylt. Dob Lovecraft dy ghoaill er hene reagheydys Weird Tales er y fa nagh by vie lhieu scughey dys Chicago, agh cha dod eh geddyn obbyr elley.[5] Er 1 Jerrey Geuree 1925, hie Sonia dys Heear-Veanagh America er son obbyr ayns Cincinnati as Cleveland, gyn çheet erash agh nish as reesht. Scugh Lovecraft dys arsane ayns slummey Red Hook ayns Brooklyn. Ga dy row caarjyn echey ayns York Noa, haink lhag-chreeys er.[5]

Leah ayns 1926, ren e nauntyn cooney da çheet erash dys Providence; agh cha lhig ad da Sonia çheet marish as dellal. Er lhieu dy nee clein far-ooasle v'ayn, as cha dod ad surranse cron ben keirdey ayns oayll y chlein.[5] Hug Sonia scarrey poosee er bun ayns 1929, agh cha dug Lovecraft ennym screeuee er yn oardagh s'jerree rieau.[5]

Haink eh erash da Providence er 17 Averil 1926 as cummal ayns 10 Barnes Street, faggys da Ollooscoill Vrown.[5] Screeu eh ny skeealyn share er enney echey 'sy traa shoh, goaill stiagh The Call of Cthulhu, At the Mountains of Madness as The Shadow Out of Time, chammah's cummal seose co-screeu mooar ass towse. Hug eh cooney da ymmodee screeudeyryn aeg, myr sampleyr, August Derleth, Donald Wandrei, Robert Bloch as Fritz Leiber.[5]

Va bleeantyn s'jerree doillee echey. Ayns 1932, hooar e naunt Lillian Clark baase. Scugh eh da 66 College Street marish e naunt elley, Annie E. Phillips Gamwell. Haink eh skeealyn dy ve ny s'lhiurey as by ghoillee eh creck ad; myr shen, cha row monney argid oc.[5] Ren e charrey Robert E. Howard dunverys hene ayns 1936, as va Lovecraft trimshagh as boirit ny yei shen. Ec y traa cheddin, va kanghyr collaneagh gyn lheihys ec Lovecraft. Hie eh stiagh ayns Jane Brown Hospital er 10 Mee Vayrnt 1937, as hooar eh baase er 15 Mee Vayrnt.[5] Hie eh er oanluckey ayns preaban y chlein ayns Swan Point Cemetery.[5]

Other Languages
aragonés: H. P. Lovecraft
asturianu: H. P. Lovecraft
башҡортса: Говард Лавкрафт
беларуская (тарашкевіца)‎: Говард Філіпс Лаўкрафт
български: Хауърд Лъвкрафт
Ελληνικά: Χ. Φ. Λάβκραφτ
Esperanto: H. P. Lovecraft
español: H. P. Lovecraft
Bahasa Indonesia: H.P. Lovecraft
Interlingue: H. P. Lovecraft
íslenska: H. P. Lovecraft
Bahasa Melayu: H. P. Lovecraft
norsk nynorsk: H.P. Lovecraft
português: H. P. Lovecraft
srpskohrvatski / српскохрватски: H. P. Lovecraft
Simple English: H. P. Lovecraft
українська: Говард Лавкрафт
Tiếng Việt: H. P. Lovecraft