Mein Kampf

An chéad imleabhar de Mein Kampf, le hAdolf Hitler. An chéad eagrán ón mbliain 1925

Leabhar is ea Mein Kampf (Gaeilge: Mo Chath Féin) a scríobh nó a dheachtaigh Adolf Hitler, an deachtóir de bhunadh Ostarach a bhí ina cheannaire ar an nGearmáin le linn ré na Naitsithe sa tír sin. Is é is ábhar don leabhar ná dírbheathaisnéis agus smaointe polaitiúla an údair, nó an idé-eolaíocht Naitsíoch mar atá aithne uirthi inniu.

Foilsíodh an chéad imleabhar sa bhliain 1925 agus an dara ceann sa bhliain 1926. Is é is ábhar don chéad imleabhar ná saol Hitler féin, agus an dara himleabhar ag tabhairt cur síos ar an ngluaiseacht Naitsíoch. Eine Abrechnung ("Reicneáil" nó "Cuntas") is teideal don chéad imleabhar, agus Die nationalsozialistische Bewegung ("An Ghluaiseacht Shóisialach Náisiúnta") atá ar an dara ceann. Chuidigh Rudolf Hess le Hitler an leabhar a chríochnú, ach ní luaitear mar chomhúdar é in aon eagrán den leabhar. Bhreac Hess agus Emil Maurice an chéad imleabhar síos ó bhéal Hitler nuair a bhí sé i bpríosún, agus scríobh sé an dara ceann nuair a bhí cead a chos aige arís. Rinneadh ceartuithe agus athruithe beaga ar na heagráin nua ó sin i leith, de réir mar a theastódh ó Hitler. Dheachtaigh Hitler leabhar eile fós le cur síos ar a chuid tuairimí i leith an pholasaí eachtraigh, ach níor foilsíodh an ceann sin riamh i ré an Tríú Reich. Maidir le Mein Kampf, áfach, bhí an-ráchairt ar an gceann sin ó tháinig Hitler i gcumhacht sa Ghearmáin, agus ba nós cóip den leabhar a bhronnadh, abair, ar na lánúineacha nuaphósta.

Thiomnaigh Hitler an chéad imleabhar dóibh siúd a fuair bás le linn cheannairc Bheoirhalla na Saoránach (Bürgerbräukeller) i München sa bhliain 1923, an iarracht réabhlóide ar gearradh téarma príosúin do Hitler mar gheall uirthi. I dtús an dara himleabhar, arís, mhol sé Dietrich Eckart, an foilsitheoir a thug a lán idéanna do Hitler agus a fuair bás cúpla bliain sular chríochnaigh Hitler an leabhar. Bhí urraim mhór ag Hitler d'Eckart agus é buíoch beannachtach as ar fhoghlaim sé ón bhfear seo.

  • achoimre

Achoimre

Leagan Fraincise den leabhar ón mbliain 1934, a haistríodh is a foilsíodh gan chead Hitler

Seo iad na pointí tábhachtacha sa leabhar:

  • Tá Hitler ag caitheamh anuas ar an Ostair mar stát, agus é den tuairim gur chóir í a chur ar ceal mar stát neamhspleách agus cúige Gearmánach a dhéanamh di. Tá sé ag ionsaí Impireacht na hOstaire, ó tá sé barúlach go bhfuil an Impireacht ag teacht an iomarca in araicis na Seiceach ag géilleadh cearta teanga dóibh.
  • Tugann Hitler cur síos ar fhorbairt a chuid frith-Ghiúdachais, agus é den bharúil gur idé-eolaíocht Ghiúdach é an Marxachas.
  • Forbraíonn sé "sóisialachas náisiúnta na nGearmánach" mar chosaint ar "shóisialachas idirnáisiúnta na nGiúdach", agus é ag moladh chath na gciníocha in áit cath na n-aicmí.
  • Tugann sé rabhadh faoin mBoilséiveachas san Aontas Sóivéadach agus é barúlach gur chóir an Boilséiveachas a dhíothú i "gcogadh na gciníocha". Ar ndóigh, tá sé suite siúráilte gurbh iad na Giúdaigh a cheap an Boilséiveachas agus gurbh iadsan atá i gceannas ar an Aontas Sóivéadach.
  • San am chéanna, tá sé den tuairim go bhfuil an Ghearmáin ag éirí róbheag ag na Gearmánaigh, agus gur chóir "spás maireachtála" (Lebensraum) a shealbhú in Oirthear na hEorpa.
  • Tá sé inbharúla gurbh é an cogadh ar dhá chathéadan san am chéanna a chaill an Ghearmáin sa chéad chogadh domhanda. Le sin a sheachaint, tugann sé le fios gur chóir don Ghearmáin comhghuaillíocht a shocrú leis na Sasanaigh agus leis na hIodálaigh (is é sin, Mussolini).
  • Faigheann sé locht ar an daonlathas parlaiminteach, agus é den tuairim gur chóir "stát Gearmánach ceannasaíochta" a chur ina ait.
  • Thairis sin, tugann sé cur síos ar a shaol agus ar fhorbairt a ghluaiseachta go dtí an bhliain 1923, mar a chonacthas an scéal dó féin.


Other Languages
Afrikaans: Mein Kampf
العربية: كفاحي (كتاب)
مصرى: كفاحى
azərbaycanca: Mein Kampf
Bikol Central: Mein Kampf
беларуская: Мая барацьба
български: Моята борба
bosanski: Mein Kampf
català: Mein Kampf
Cebuano: Mein Kampf
čeština: Mein Kampf
Cymraeg: Mein Kampf
dansk: Mein Kampf
Deutsch: Mein Kampf
Ελληνικά: Ο Αγών μου
English: Mein Kampf
Esperanto: Mein Kampf
español: Mi lucha
eesti: Mein Kampf
euskara: Mein Kampf
فارسی: نبرد من
suomi: Taisteluni
français: Mein Kampf
galego: Mein Kampf
हिन्दी: मीन कैम्फ
hrvatski: Mein Kampf
magyar: Mein Kampf
Հայերեն: Իմ պայքարը
Bahasa Indonesia: Mein Kampf
íslenska: Mein Kampf
italiano: Mein Kampf
日本語: 我が闘争
Basa Jawa: Mein Kampf
ქართული: ჩემი ბრძოლა
한국어: 나의 투쟁
Latina: Mein Kampf
Lingua Franca Nova: Mein Kampf
lietuvių: Mano kova
latviešu: Mana cīņa
македонски: Мојата борба
Bahasa Melayu: Mein Kampf
Mirandés: Mein Kampf
Nederlands: Mein Kampf
norsk: Mein Kampf
occitan: Mein Kampf
polski: Mein Kampf
português: Mein Kampf
română: Mein Kampf
armãneashti: Mein Kampf
русский: Моя борьба
Scots: Mein Kampf
srpskohrvatski / српскохрватски: Mein Kampf
Simple English: Mein Kampf
slovenčina: Mein Kampf
slovenščina: Moj boj
shqip: Mein Kampf
српски / srpski: Мајн кампф
svenska: Mein Kampf
Kiswahili: Mein Kampf
Tagalog: Mein Kampf
Türkçe: Kavgam
українська: Моя боротьба
Tiếng Việt: Mein Kampf
ייִדיש: מיין קאמף
Zeêuws: Mein Kampf
中文: 我的奋斗