Fonn Oighir agus Tine

Fonn Oighir agus Tine  
Clúdaigh Meiriceá Thuaigh don sraith (as Béarla)
Údar George R. R. Martin
Tír SAM
Teanga Béarla
Foilsitheoir Bantam Books (SAM, Ceanada)
Voyager Books (RA, An Astráil)
AST(an Rúis)

Is sraith fantaisíochta eipiciúil é Fonn Oighir agus TineA Song of Ice and Fire leis an údar agus an scríbhneoir scáileáin Meiriceánach George R. R. Martin. Thosaigh Martin ar an tsraith úrscéalta sa bhliain 1991, agus foilsíodh an chéad imleabhar, Cluiche na CorónachA Game of Thrones, sa bhliain 1996. Bheartaigh Martin tríológ a scríobh i dtosach báire, ach le himeacht ama, d'fhás an tsraith chomh mór sin go raibh air an cinneadh a dhéanamh sraith de cheithre leabhar a dhéanamh di, agus níos moille arís, fadaíodh í go seacht leabhar. Ghlac an cúigiú imleabhar, A Dance with Dragons, cúig bliana lena scríobh go dtí gur foilsíodh é sa bhliain 2011. Tá an séú leabhar, The Winds of Winter, á scríobh ag Martin i láthair na huaire.

Tarlaíonn móreachtraí na sraithe ar dhá ilchríoch fhicseanúla, Iartharas (Westeros) agus Oirthearas (Essos), a mbaineann stair fhada leo araon a théann na cianta siar go dtí nach féidir an fhírinne a dhealú ón fhinscéal. Insítear an plota sa tríú pearsa ó dhearcadh na gcarachtar, agus faoin gcúigiú úrscéal, cuireadh caibidlí faoinár mbráid ó dhearcadh 31 duine. Fítear trí scéal éagsúla le chéile sa tsraith théagartha: déantar croiniceacht ar chogadh ríoraí idir teaghlaigh uaisle na Seacht Ríocht (The Seven Kingdoms) a fheartar chun an Ríchathaoir Iarainn (The Iron Throne) agus réim Iartharais a bhuachan; leantar aiséirí bagrach an Aos Alltair (The Others) - neacha fuara oighreata a chaith na cianta faoi shuan lastuaidh ón Múr ollmhór oighir a scarann an fiántas ón tsibhialtacht ag teorainn thuaisceartach na Seacht Ríocht; agus is é an treas cuid ná eachtra uaillmhianach Danaeras Tairgéirian (Daenerys Targaryen), iníon dheoraíoch an rí a maraíodh i gcogadh cathartha díreach sular rugadh í, agus í ag iarraidh filleadh ar Iartharas lena trí dhragan chun a ceart folaíochta, coróin na Seacht Ríocht, a éileamh ó na forghabhálaithe a d'athrígh a cineálsa.

Údar na sraithe Fonn Oighir agus Tine, George R.R. Martin

Thug Martin dúshlán ar chomhghnásanna shéanra na hArdfhantaisíochta trí inspiorad a tharraingt ó eachtraí stairiúla ar nós Chogadh na Rósanna ó stair Shasana. Moladh an sraith dá réadúlacht; cuirtear srian suntasach ar an méid draíochta a úsáidtear, agus cuirtear béim ollmhór ar an gcogaíocht agus ar an gcaimiléireacht pholaitíochta a chránn muintir na Seacht Ríocht. Tá an foréigean, an chollaíocht agus débhrí ó thaobh na moráltachta de go mór chun cinn ar fud na saothar, agus déantar breis is míle carachtar a ainmniú thar na sraithe. Maraítear príomhcharactair go mion minic ionas nach féidir le léitheoirí dul i muinín go bhfanfaidh na laochra slán sábhálta. Ligeann an struchtúr ildearctha dúinn carachtair a fhiosrú ó taobhanna éagsúla sa chaoi is gur féidir leis na bithiúnaigh mar dhea a dtuairimí agus a ndearcadh féin a thabhairt freisin. Cáineadh an tsraith mar gheall ar an léiriú ilghnéitheach a thugtar ar mhnáibh agus ar an gcreideamh.

Cé gur fhoilsíodh na leabhair i gcéaduair gan mórán poiblíochta a tharraingt orthu, tá úrscéalta na sraithe tar éis breis is 15 mhilliún cóip a dhíol ar fud an domhain agus rinneadh iad a aistriú go breis is 20 teanga ó shin. Shroich an ceathrú agus an cúigiú imleabhar an chéad áit ar liostaí Leabhar Sárdhíola de chuid The New York Times ar a n-eisiúint. Tá mórán saothair díoraithe scríofa in éineacht leis an bpríomhshraith, trí réamh-nóibhille, an tsraith rathúil teilifíse HBO "Game of Thrones", athchóiriú greannáin, agus roinnt cluichí cártaí, boird agus físe.

Cluiche na Corónach an t-ainm Gaeilge a cuireadh ar an gcéad leabhar sa tsraith, a d'aistrigh Oisín Ó Muirthile agus a d'fhoilsigh Leabhar Breac i mí Dheireadh Fómhair na bliana 2016

Other Languages
беларуская: Песня Лёду і Агню
беларуская (тарашкевіца)‎: Сьпеў лёду і агню
français: Le Trône de fer
Bahasa Indonesia: A Song of Ice and Fire
日本語: 氷と炎の歌
Кыргызча: Муз жана от ыры
srpskohrvatski / српскохрватски: A Song of Ice and Fire
Simple English: A Song of Ice and Fire
slovenščina: Pesem ledu in ognja
српски / srpski: Песма леда и ватре
Tiếng Việt: A Song of Ice and Fire
Bân-lâm-gú: A Song of Ice and Fire