Maarskalk

In maarskalksstêf, it teken fan 'e rang fan in maarskalk.

In maarskalk of fjildmaarskalk is in opperofsier fan 'e heechste rang yn 'e nasjonale kriichsmacht fan in beheind tal lannen. Dizze rang komt foar by de lânmacht, de loftmacht en de maresjesee; de ekwivalinte rang by de marine is grutadmiraal of admiraal fan de float. It wurd 'maarskalk' komt oarspronklik fan it Aldfrankyske *marhscalc of *marhskalk, fan *marha ("hynder", ferlykje 'merje') en scalc of skalk ("jonge"). De oarspronklike etymology fan it wurd 'maarskalk' is dus "stâljonge".

Yn 'e militêre rangoarder stiet in maarskalk boppe in generaal, en fiert er yn prinsipe it befel oer legergroepen dêr't ferskate legers yn gearbrocht binne. Dêrmei is it de heechste rang dy't der bestiet, hoewol't de rang fan maarskalk yn 'e measte kriichsmachten fan 'e wrâld net foarkomt, sadat de rang fan generaal ornaris it heechst is. De Nederlânske kriichsmacht ken bgl. gjin maarskalksrang mear; de lêste Nederlânske fjildmaarskalk wie prins Freark, de soan fan kening Willem I, yn 'e earste helte fan 'e njoggentjinde iuw.

Maarskalken komme hjoed oan 'e dei noch foar yn 'e legers fan Bolivia, Brazylje, Fenezuëla, Finlân, Frankryk, Grut-Brittanje, Itaalje, Nij-Seelân (allinnich by de loftmacht), Paraguay, Perû, Poalen, Roemeenje, Ruslân en Turkije. Yn 'e Britske striidkrêften komt by de lânmacht de fjildmaarskalk (field marshal) foar en by de loftmacht de maarskalk. Histoarysk hiene ek de legers fan Dútslân oant 1945 (Generalfeldmarschall), de DDR, Eastenryk-Hongarije (Feldmarschall en Feldmarschalleutnant), Joegoslaavje en de Sovjet-Uny de rang fan maarskalk.

Militêre rangen dy't ekwivalint binne mei dy fan maarskalk komme ek yn guon legers foar, mei as bekendste foarbyld de (tige seldsume) generaal fan it leger ('fiifstjerregeneraal') yn 'e Amerikaanske kriichsmacht. Oare lannen mei ferlykbere rangen binne Egypte en ferskate oare Arabyske lannen (mušir), Fjetnam (nguyên soái of thống chế), Grikelân (stratarches), Iran (artešbod), Japan (gensui), Kroaasje (vrhovnik), Noard- en Súd-Koreä (wonsu), Sina (yuan shuai) en Tailân (chom phon).

Skematysk oersjoch

Oersjoch fan 'e maarskalksrangen mei ekwivalinten yn oare kriichsmachtûnderdielen:

lânmacht
en mariniers
marine loftmacht
maarskalk
of fjildmaarskalk
of generaal fan it leger
grutadmiraal
of admiraal fan de float
maarskalk fan de loftmacht
generaal admiraal generaal
of opperloftmaarskalk
luitenant-generaal fise-admiraal luitenant-generaal
of loftmaarskalk
generaal-majoar skout-by-nacht generaal-majoar
of fise-loftmaarskalk
Other Languages
azərbaycanca: Marşal
Boarisch: Mareschallo
беларуская: Маршал
български: Маршал
čeština: Maršál
Deutsch: Marschall
Ελληνικά: Στρατάρχης
English: Marshal
Esperanto: Marŝalo
español: Mariscal
eesti: Marssal
galego: Mariscal
Հայերեն: Մարշալ
hrvatski: Maršal
magyar: Marsall
íslenska: Marskálkur
italiano: Maresciallo
日本語: 元帥
қазақша: Маршал
한국어: 원수 (군사)
Latina: Marescalcus
lietuvių: Maršalas
монгол: Маршал
Bahasa Melayu: Marsyal
norsk: Marskalk
پښتو: مارشال
português: Marechal
română: Mareșal
русский: Маршал
Scots: Marshal
srpskohrvatski / српскохрватски: Maršal
slovenčina: Maršal
slovenščina: Maršal
српски / srpski: Маршал
svenska: Marskalk
Türkçe: Mareşal
ئۇيغۇرچە / Uyghurche: مارشال
українська: Маршал
اردو: سالار
oʻzbekcha/ўзбекча: Marshal
Tiếng Việt: Nguyên soái
中文: 元帅