Virginia Henderson

Stemma Carpi.png Carpśàn
C'l artìcul chè 'l è scrit in CarpśànEmiliàn

La Virginia Henderson (Kànsas City, 30 'd novèmber dal 1897 - Brandford, 19 ed mers dal 1996) l'era stèda n'inferméra, arsercadóra, teòriśadóra e avtóra.

In tant che inferméra, insgnànta e arsercadóra, la Henderson l'ìva teoriśê in sim'ai biśògn fondamentêl dal persòuni, anca in funsiòun ed n'utilitê in di só insgnamèint, in "Quatòrdeś biśògn fondamentêl", teorìa che la Henderson la publichèva in soquànt giurnêl specialìstic e pò in di só lìber "The Principles and Practice of Nursing (1955)" e "Basic Principles of Nursing Care" (1960).
Incòr incō 'l elèinc di quatòrdeś biśògn fondamentêl al vin tòlt in còunt in dla formasiòun dal personêl infermēr.

Elèinc di quatòrdeś biśògn fondamentêl

I "quatòrdeś biśògn fondamentêl" i mèt'n in fila i biśògn di cristiàṅ secònd la lōr urgìnsa e prioritê:

  • Respirèr
  • Bèv'r e magnèr
  • Descarghèr
  • Móv'r-es e mantgnìr na bòuna postùra
  • Durmìr e 'rpunsèr-es
  • Vistìr-es e śvistìr-es
  • Mantgnìr la tàimpradùra dal côrp in di lìmit dla normalitê
  • Stèr pulî e protéger la só pèla
  • Evitèr i perìcol
  • Comunichèr coi só sìmil
  • Agìr secònda el só credèinsi e valōr
  • Mantgnìr-es ocupê per realiśèr-es
  • Divertìr-es
  • Imparèr