Linda Fiorentino

Linda Fiorentino
Nome real Clorinda Fiorentino
Nacencia 9 de marzu de 1958 (59 años)
Bandera de Estaos Xuníos d'América Filadelfia - Pensilvania
Ficha en IMDb

Linda Fiorentino ( Filadelfia - Pensilvania, 9 de marzu de 1958) ye una actriz d' Estaos Xuníos d'ascendencia italiana, conocida poles sos interpretaciones en películes como La última seducción (película que la consagraría como musa del cine independiente estaunidense), Dogma, Jade y Men in Black.

Biografía

Antes de tomar la decisión definitiva de convertise n'actriz Linda pensara n'estudiar p'abogada (anque se graduara en Ciencies Polítiques pola universidá de Rosemont, Pensilvania).

Los fans de Linda Fiorentino consideren los sos primeros años de carrera cinematográfica como los más notables. En pasando d'interpretar a la moza na comedia romántica Llocu por ti (1985) a heroína convencional en ¡Te pillé! (1985) Linda alzó les ceyes (y temperatures) de más d'unu nel so papel de cadarma de notable arquitectura con predilección polos xuegos sexuales maldadosos na película After Hours de Martin Scorsese (titulada n'España Jo, ¡qué nueche!).

Poco dempués abriríase un paréntesis na so carrera nel que taría perdida en papeles indescribibles en diverses películes insignificantes, seique por cuenta de la so bien merecida fama d'actriz difícil de tratar. La renacencia llegaría-y (como a John Travolta) pa llanzala definitivamente al estrellalgu col papel de viuda negra – muyer fatal amoral y ensin escupulicios na película de baxu presupuestu de John Dahl, La última seducción (1994). Nun mundu menos suxetu a riegles l'actriz sería nomada al Oscar, pero'l que s'estrenara na televisión por cable primero que nos cines provocó que fora inelegible pola Academia Americana, anque sí recibió'l Independent Spirit Award, el qu'estimó aludiendo a que se trataba de la reconocencia que-y diera la xente cola que siempres trabayara y que yera ello lo que realmente-y importaba; el London Critics Circle Filme Awards y el New York Filme Critics Circle Awards pol so papel de Bridget Gregory en La última seducción.

L'ésitu de La última seducción rellanzó la so carrera lo suficiente, pero los papeles qu'escoyó de siguío nun podíen menos que considerase sucedaneos (el más notable'l de la película de suspense Jade de William Friedkin) lo cual rápido dilapidó el creitu que-y diera la película de Dahl.

Sicasí Linda gociaría dempués de ciertu grau de reconocencia pol so papel como únicu descendiente vivu de Xesucristo en Dogma de Kevin Smith (1999), o la curiosa forense que prefería la compañía de los muertos a los vivos en Men in Black (1997) y siguiría trabayando costantemente en toa clase de películes, incluyendo Criminal y decente de Thaddeus O'Sullivan, onde interpretaba a unu de los amores d'un criminal carismáticu de Dublín ( Kevin Spacey) o Nel puntu de mira (2002) onde nuevamente vuelve encarnar un papel femenín que lu marcó mientres tola so carrera, el de muyer independiente, sofisticada, curiosa y fría, esta vegada na figura de la esposa d'un magnate de la industria armamentística retenida nuna plaza pública por un francotirador vengatible ( Wesley Snipes) qu'acusa al so home de vender l'arma qu'asesinó a la so fía.

Other Languages
emiliàn e rumagnòl: Linda Fiorentino
Esperanto: Linda Fiorentino
français: Linda Fiorentino
Bahasa Indonesia: Linda Fiorentino
Nederlands: Linda Fiorentino
português: Linda Fiorentino
srpskohrvatski / српскохрватски: Linda Fiorentino
српски / srpski: Линда Фјорентино
українська: Лінда Фіорентіно