Cantar de los Nibelungos

Primer páxina del manuscritu. (ca. 1230).

El Cantar de los nibelungos (n'alemán Nibelungenlied) ye un poema épicu de la Edá Media, escritu nel sieglu XIII, anónimu, d'orixe xermanu.

Esti cantar de xesta axunta munches de les lleendes esistentes sobre los pueblos xermánicos, entemecíes con fechos históricos y creencies mitolóxiques que, pola fondura del so conteníu, complexidá y variedá de personaxes, convirtióse na epopeya nacional alemana, cola mesma xerarquía lliteraria del Cantar de mio Cid n'España y el Cantar de Roldán en Francia.

Nel Cantar de los nibelungos nárrase la xesta de Sigfrido, un cazador de dragones de la corte de los burgundios, que valiéndose de dalgunos artificios consigue la mano de la princesa Krimilda. Sicasí, una cabileña indiscreción femenina termina provocando una cadena de vengaciones. El traidor Hagen, afaya que Sigfrido nun ye invulnerable por tar bañáu col sangre d'un dragón, darréu qu'esiste una pequeña porción del so llombu au se depositó una fueya de tilu y el sangre nun tocó la so piel. Aprovechando esti puntu feble, mátalu a traición nun regatu.

Pocos años dempués Krimilda abellúgase na corte del rei Etzel (Atila) al casase con él y dexa pasar el tiempu, hasta que nuna llacuada convocada por Etzel, tres una espantible carnicería, Krimilda consigue vengase, los sos hermanos Geiselher y Gernot muerren asesinaos y prinden a Gunter y Hagen. Finalmente ordena esgañotar al so hermanu Gunter pa consiguir que Hagen confiese aú garabó l'ayalga de los nibelungos, pero al negase esti, Krimilda toma la espada de Sigfrido y esgañótalu. Hildebrando de Berna y el rei Etzel contemplen la escena y Hildebrando entrando en cólera pola llaina muerte del embravecíu Hagen toma la so espada y curtia a Krimilda en dos.

El manuscritu del Cantar, que se caltién na Biblioteca Estatal de Baviera, ta inscritu nel Programa Memoria del Mundu de la UNESCO nel 2009 como reconocencia de la so significancia histórica.

El compositor alemán Richard Wagner inspiróse en dalguna midida nesti poema épicu y na tradición mitolóxica xermánica y nórdica pa componer la tetraloxía operática Der Ring deas Nibelungen ('L'aniellu del nibelungu'). Tamién se llevó al cine por Fritz Lang en 1924 col títulu de Los nibelungos.

Other Languages
Alemannisch: Nibelungenlied
Boarisch: Nibelungenliad
Bahasa Indonesia: Nibelungenlied
Limburgs: Nibelungenlied
Nederlands: Nibelungenlied
srpskohrvatski / српскохрватски: Nibelungenlied
Simple English: Nibelungenlied
slovenščina: Pesem o Nibelungih
Tiếng Việt: Nibelungenlied