Postleitzahl (Schweiz)

D Schwizer Poscht hät 1964 als dritts Land (noch der Dütscha Bundesposcht und em United States Postal Service) d Poschtlaitzahla iigfüehrt.

I da Schwiiz sind d Poschtleitzahla vierschtellig. Wi bim neua Poschtleitzahlasyschtem z Dütschland ka a Gmeind mehreri Poschtlaitzahla erhalta. Dass a Ortschaft a aigeni Poschtlaitzahl hät, bedütet also nöd, dass es sich umana sälbschtschtändegi politischi Gmaind handlet. Dazua kunnt no, dass a Poschtlaitzahl mehreri politischi Gmainda umfassa ka (Bsp.: 3048 Worblaufen, umfasst Tail vo da Gmainda Bern und Ittigen), also a aidütegi Zuaordnig i beid Richtiga nöd 100% möglich isch. Zuasätzlich ischt d Adressirig vo einzelna Poschtschtella i grössera Städt vilfach nöd möglich (3000 Bern 1, 3000 Bern 2 usw.) Us demm Grund wört intern mit sexschtelliga Poschtlaitzahla gschaffet (300001, 300002).

I di schwizerische Poschtlaitzahla isch o s Förschtetum Liachtaschtei ibezoga. Di dütsch Enklava Büsingen am Hochrhein wia au di italienisch Enklava Campione d’Italia händ zuasätzlich zur nationala no je a eigeni Schwiizer Poschtleitzahl.