Johann Joachim Quantz

Dr Johann Joachim Quantz (* 30. Januar 1697 z Scheede ( Kurfürstedum Braunschweig-Lüneburg) as Hanß Jochim Quantz [1]; † 12. Juli 1773 z Potsdam) isch e dütsche Flötist, Flötebauer, Komponist und Flötelehrer vom Friedrich em Groosse gsi. Sini Zitgenosse häi si Naame au Quanz gschriibe.

Dr Johann Joachim Quantz

Lääbe

S Quantz-Dänkmol z Scheede

Im Quantz si Vater isch dr Hiefschmiid Andreas Quantz Oberscheede gsi. Noch em Dood vo de Eltere häi sich Unggle Justus Quantz, wo dr Stadtmusikus z Merseburg gsi isch, und dr Maa vo sinere Gusiine, dr Organist Johann Friedrich Kiesewetter um si Usbildig kümmeret. 1714 isch dr Quantz Stadtpfifer z Pirna worde und er het drfüür Giige, Oboe, Drumbeete, Zink, Waldhorn, Posuune, Blockflöte, Fagott, Violoncello, Gambe und Kontrabass gleert spiile. [2] 1716 het er e Stell in dr Stadtkapälle vo Dresde (Oboe und Flöte) überchoo. Noch zwäi Joor isch er Oboist in dr Polnische Kapälle vom August II. worde.

1717 het er z Wien studiert, im Joor druf z Dresde Querflöte gleert und het afo komponiere. 1724 bis 1726 het er e Studieräis uf Italie gmacht und z Neapel dr Alessandro Scarlatti kennegleert. Er isch e Fründ vom Kastrat Farinelli worde und isch uf Venedig zum sin musikalische Vorbild Vivaldi zuzloose. Vo 1726 bis 1727 isch er z Bariis und z London. Dört het em dr Händel vorgschlaage, in Ängland z bliibe. 1728 isch er Flötespiiler bi dr Kurfürstlig-Säggsische und Königlich-Polnische Kapälle z Dresde worden und het dr pröissisch Chronbrinz Friedrich kennegleert und däm afo Flötenunderricht gee. Däm si Vater het das aber bald verbote. 1737 het dr Quantz d Anna Rosina Carolina Schindler ghürootet. Wo dr Friedrich Köönig worde isch, het er dr Quantz 1741 zu sim Kammermusikus und Hofkomponist gmacht. Er het im Friedrich jeede Daag Underricht im Fläätespiile gee, het Huskonzärt organisiert und komponiert. Er het au sälber Flöte baut und 1752 s Flöte-Leerbuech Versuch einer Anweisung die Flöte traversière zu spielen gschriibe.

Er isch bis zu sim Dood an Hoof vom Friedrich bliibe.

Other Languages